Janubiy Koreyaning SK Hynix kompaniyasi $28,6 mlrdlik aksiyalarini qayta sotib olish va bekor qilish bo‘yicha yirik dasturini e’lon qildi.

Kompaniya direktorlar kengashi 40 trln von ($28,6 mlrd) miqdoridagi o‘z aksiyalarini bozordan qayta sotib olish va keyinchalik ularni muomaladan butunlay chiqarish to‘g‘risida qaror qabul qildi.

Amaldagi aksiya narxidan kelib chiqilsa, buyback doirasida taxminan 24,07 mln dona aksiya qayta sotib olinadi. Bu SK Hynix’ning jami chiqarilgan aksiyalarining qariyb 3,3%ini tashkil etadi.

Aksiyalarni qayta sotib olish jarayoni 20-avgustdan 19-noyabrgacha davom etishi rejalashtirilgan. Xaridlar yakunlangach, qayta sotib olingan aksiyalar bekor qilinadi va muomaladagi aksiyalar soni kamayadi.

SK Hynix ma’lumotiga ko‘ra, bu Janubiy Koreya fond bozorida listingdan o‘tgan kompaniyalar tarixidagi eng yirik aksiyalarni qayta sotib olish va bekor qilish dasturi hisoblanadi.

Kompaniya bunday qarorga aksiyalarining joriy bozor narxi biznesning real qiymati, pul oqimi yaratish imkoniyati va uzoq muddatli o‘sish salohiyatini to‘liq aks ettirmayapti, degan fikr asosida kelgan. 2026-yilning ikkinchi choragi yakunida SK Hynix’ning sof pul mablag‘lari qariyb 69 trln vonni tashkil etgan.

Aksiyalar bekor qilingach, kompaniyaning muomaladagi aksiyalari soni kamayadi. Boshqa ko‘rsatkichlar o‘zgarmagan taqdirda, bu kelgusida bir aksiya uchun daromad — EPS ko‘rsatkichining oshishiga va mavjud aksiyadorlarning kompaniyadagi ulushi nisbatan kattalashishiga olib kelishi mumkin.

Bundan tashqari, SK Hynix 2025–2027-yillarda shakllanadigan jami erkin pul oqimining (FCF) 50%dan ortig‘ini aksiyadorlarga qaytarishni rejalashtirmoqda. Bunda buyback va aksiyalarni bekor qilish bilan bir qatorda oddiy hamda maxsus dividendlar ham ko‘rib chiqiladi.