O'zbekiston 2025-yilning mart oyida oltin savdosi bo'yicha jahon miqyosidagi eng yirik eksportchi davlat sifatida e'tirof etildi. Ma'lumotlarga ko'ra, mamlakat bir oy davomida 11 tonna oltin eksport qilib, xalqaro bozorlarda o'z mavqeini yanada mustahkamladi.

Global miqyosda markaziy banklar oltinga bo'lgan qiziqish oshayotgan bir paytda, mart oyida dunyo bo'yicha davlarlar tomonidan umumiy 35 tonna oltin xarid qilingan bo'lsa, 18 tonna hajmidagi sotuv operatsiyalari ham amalga oshirildi.

Oltin xarid qilish bo'yicha faollik ko'rsatgan davlatlar qatorida Polsha (16 tonna), Qozog'iston (11 tonna) va Xitoy (3 tonna) ajralib turdi. Oltin sotish bo'yicha esa O'zbekiston yetakchi bo'lib, undan keyin Singapur (5 tonna) va Qirg'iziston (2 tonna) joylashdi.

2025-yilning birinchi choragida O'zbekiston jami 15 tonna oltin sotdi va bu ko'rsatkich bilan boshqa barcha mamlakatlardagi oltin sotuvchilari orasida birinchi o'rinni egalladi. Hozirda oltin narxi $3 300 dollardan yuqorida savdo qilinmoqda.