2026-yil boshidan buyon eng ko‘p o‘sgan S&P 500 kompaniyalari orasida Moderna ikkinchi o‘ringa ko‘tarildi. Bunga kompaniyaning saratonga qarshi mRNA texnologiyasi bo‘yicha e’lon qilgan ijobiy klinik natijalari sabab bo‘ldi.

19-avgust kuni Moderna aksiyalari bir savdo sessiyasida 176,97%ga oshib, $62,96 dan $174,38 gacha ko‘tarildi. Bu kompaniya tarixidagi eng katta bir kunlik o‘sish bo‘ldi.

Keskin o‘sishga Moderna va Merck hamkorligida ishlab chiqilayotgan shaxsiylashtirilgan mRNA saraton terapiyasining uchinchi bosqich klinik sinovlaridagi ijobiy natijalar turtki berdi.

Preparat intismeran autogene deb nomlanadi va Merck’ning Keytruda immunoterapiyasi bilan birgalikda melanoma bilan kasallangan bemorlarda sinovdan o‘tkazilmoqda. Uchinchi bosqich tadqiqotida kombinatsiya saratonning qaytalanishisiz yashash bo‘yicha asosiy maqsadga erishdi.

Ushbu natija mRNA texnologiyasining COVID-19 vaksinalaridan tashqari, saraton kasalliklarini davolashda ham qo‘llanish imkoniyatini ko‘rsatgani sabab investorlar tomonidan katta qiziqish bilan kutib olindi. Shu bilan birga, preparat hali regulyatorlar tomonidan tasdiqlanmagan va klinik sinovlarning batafsil natijalari keyinroq e’lon qilinishi kutilmoqda.

Aksiyalarning keskin ko‘tarilishi Moderna narxining pasayishiga pul tikkan treyderlarga ham katta zarar yetkazdi. S3 Partners hisob-kitoblariga ko‘ra, short-sotuvchilar bir kunning o‘zida taxminan $5,5 mlrd mark-to-market zarar ko‘rgan.

Moderna aksiyalaridagi yuqori short-interest o‘sishni yanada tezlashtirgan bo‘lishi mumkin: aksiyalar ko‘tarilgach, ayrim treyderlar zararlarni cheklash uchun short pozitsiyalarini yopishga majbur bo‘lgan va bu bozordagi xarid bosimini yanada oshirgan. ORTEX ma’lumotlariga ko‘ra, o‘sha paytda kompaniyaning erkin muomaladagi aksiyalarining qariyb 13,5%iga short pozitsiyalar ochilgan.

Natijada Moderna nafaqat 2026-yilning eng keskin bir kunlik rallilaridan birini qayd etdi, balki mRNA texnologiyasining saraton davolashidagi imkoniyatlariga nisbatan investorlar qiziqishini ham sezilarli darajada oshirdi.