Sukuk - bu islom shariatiga mos keladigan obligatsiyalarga o'xshash moliyaviy vosita. Sukuk ko'pincha "islomiy obligatsiyalar" deb ham ataladi, ammo ular klassik obligatsiyalardan tubdan farq qiladi.

Sukuk so'zi arabcha "sakk" so'zidan kelib chiqqan bo'lib, moliyaviy sertifikat ma'nosini anglatadi.

Sukuk islom moliyasida taqiqlangan foizli (ribo) qarz emas, balki sherikchilikka asoslangan investitsiya hisoblanadi.

Bu biznesni moliyalashtirishning bir usuli bo'lib, an'anaviy foiz to'lovlarisiz sheriklar loyiha natijalariga asoslangan daromad olishadi.

Misol uchun, savdo markazi qurmoqchisiz. Biznesingizni moliyalashtirish uchun sukuk chiqarib sotasiz, ya'ni bu setifikat savdo markazi qurilishiga ulush egalikni anglatadi.

Savdo markazi qurilib bitganidan so'ng, uni ijaraga berib daromad olishni boshlaysiz. Bu daromaddan investor (sukuk egasi)ga kelishilgan foyda beriladi.

  Sukuk va an'anaviy obligatsiyalar o'rtasidagi farq nimada?

An'anaviy obligatsiyalarda obligatsiya egasi (investor) biznes muvaffaqiyatli bo'lishi yoki bo'lmasligidan qat'iy nazar, foiz ko'rinishida belgilangan daromad oladi.

Sukukda esa risk tomonlar o'rtasida taqsimlanadi.

Tahlilchilarning hisob-kitobiga ko'ra, sukuk moliyaviy sektori 2027-yilga borib o'rtacha yillik 1,98 trillion dollarga yetishi kutilmoqda.