2026-yilning birinchi yarim yilligida O‘zbekistonda aholi jon boshiga to‘g‘ri keladigan umumiy daromad 16,1 mln so‘mni tashkil etdi. Bu haqda Statistika qo‘mitasi ma’lum qildi. Statistika qo‘mitasi ma’lumotlari

Hisobotga ko‘ra:

• nominal daromadlar 14,5 foizga oshgan

• inflyatsiya hisobga olinganda real daromadlar 7,3 foizga o‘sgan

• aholi jon boshiga daromad 16,1 mln so‘mga yetgan

Oddiy hisob-kitob qiladigan bo‘lsak, 16,1 mln so‘mni olti oyga bo‘lganda oyiga o‘rtacha 2,68 mln so‘mga to‘g‘ri keladi.

Biroq bu raqamni aholining o‘rtacha oylik maoshi sifatida tushunmaslik kerak. Aholi jon boshiga daromad ko‘rsatkichi ish haqi bilan cheklanmaydi. Unga tadbirkorlik faoliyatidan olinadigan daromadlar, transferlar, mulkiy daromadlar va boshqa tushumlar ham kiradi.

Yana bir muhim jihat — 7,3 foizlik real o‘sish barcha fuqarolarning daromadi aynan 7,3 foizga oshganini anglatmaydi.

Bu o‘rtacha statistik ko‘rsatkich. Daromadlarning aholining turli qatlamlari o‘rtasida qanday taqsimlangani alohida masala. Masalan, yuqori daromadli qatlamlarning daromadi tezroq o‘ssa, umumiy o‘rtacha ko‘rsatkich ham yuqorilashi mumkin.

Shu sababli 16,1 mln so‘mlik ko‘rsatkichni aholining real xarid qobiliyatini baholashda boshqa indikatorlar, jumladan, inflyatsiya, ish haqi o‘sishi va daromadlar taqsimoti bilan birgalikda ko‘rib chiqish muhim.

Xullas, qo‘shnim har kuni qo‘y go‘shti yeydi, men esa faqat kartoshka. Statistika bo‘yicha esa ikkalamiz ham har kuni qozon kabob yeyapmiz.