20-avgust kuni SpaceX’ning yana 319 mln dona aksiyasi lock-up cheklovidan chiqarilib, investorlar tomonidan erkin sotilishi mumkin bo‘ldi. Bu kompaniyaning iyun oyidagi IPOsidan keyingi ikkinchi yirik aksiya “unlock” bosqichi hisoblanadi.

Ushbu aksiyalar asosan SpaceX’ning dastlabki investorlari va xodimlariga tegishli bo‘lib, IPOdan keyingi ma’lum muddat davomida ularni bozorda sotishga cheklov qo‘yilgan edi. 20-avgustdan boshlab ushbu 319 mln dona aksiya ham savdo uchun ochildi.

Birinchi yirik unlock 6-avgust kuni amalga oshirilgan va o‘shanda qariyb 911,5 mln dona aksiya savdo qilish uchun ochilgan edi. Shu tariqa, avgust oyidagi ikki unlock doirasida jami qariyb 1,23 mlrd dona aksiya bozorga chiqish imkoniyatiga ega bo‘ldi.

Bundan tashqari, SpaceX iyun oyida o‘tkazgan IPO davomida 638,9 mln dona aksiyani investorlarga joylashtirgan. Ularni ham hisobga olganda, hozirda qariyb 1,87 mlrd dona SpaceX aksiyasi erkin savdo qilinishi mumkin.

Bu kompaniyaning muomaladagi jami qariyb 13,2 mlrd dona aksiyasining 14%dan ortig‘iga teng. Shunga qaramay, SpaceX aksiyalarining katta qismi hali ham kompaniya asoschilari, xodimlari va dastlabki investorlar qo‘lida lock-up cheklovlari ostida qolmoqda.

Muhimi, aksiyalarning “unlock” qilinishi ularning barchasi darhol sotildi degani emas. Bu faqat aksiya egalariga o‘z ulushlarini ochiq bozorda sotish imkoniyati berilganini anglatadi. Shunga qaramay, bozordagi potensial taklifning oshishi aksiya narxiga bosim o‘tkazishi mumkin.

20-avgustdagi unlock fonida SpaceX aksiyalari savdolar davomida qariyb 5%ga pasayib, kompaniyaning iyun oyidagi $135lik IPO narxidan pastga tushdi. Investorlar bozorda yangi aksiyalar taklifi ko‘payishini kuzatishda davom etmoqda.

Kelgusi oylarda SpaceX’da yana bir nechta yirik lock-up muddatlari yakunlanishi kutilmoqda. Xususan, noyabr oyida qariyb 1,3 mlrd dona aksiya savdoga ochilishi rejalashtirilgan, bu esa SpaceX aksiyalaridagi volatillikni yana oshirishi mumkin.