Kompaniya aksiyadorlarining 11-avgust kuni o‘tkazilgan yillik umumiy yig‘ilishida har bir oddiy aksiya uchun 98,5 so‘mdan dividend to‘lash tasdiqlandi. Bu oddiy aksiyaning nominal qiymatiga nisbatan 9,85% daromadlilikni anglatadi.

Oddiy aksiyalar bo‘yicha dividend to‘lovlariga jami 28,5 mlrd so‘m yo‘naltiriladi. Bu kompaniyaning 2025-yil yakunidagi sof foydasining qariyb 52 foiziga teng.

Imtiyozli aksiyalar egalari esa har bir aksiya uchun 240 so‘mdan dividend oladi. Bu aksiyaning nominal qiymatiga nisbatan 24%ni tashkil qiladi. Ushbu toifadagi aksiyalar uchun jami 3,39 mlrd so‘m dividend ajratilgan.

Natijada oddiy va imtiyozli aksiyalar bo‘yicha jami dividend to‘lovlari 31,89 mlrd so‘mga yetadi. “O‘zbekinvest” 2025-yilni 54,83 mlrd so‘m sof foyda bilan yakunlagan bo‘lib, uning 58,2 foizga yaqin qismi aksiyadorlarga qaytariladi.

Imtiyozli aksiyalar bo‘yicha dividendlar 2026-yil 5-avgust holatiga aksiyadorlar reestriga kiritilgan investorlarga to‘lanadi. Fond bozoridagi T+2 hisob-kitob tartibini inobatga olganda, dividend olish huquqiga ega bo‘lish uchun aksiyalarni 3-avgust kuni oxirigacha sotib olish talab etilgan.

Openinfo ma’lumotlariga ko‘ra, oddiy va imtiyozli aksiyalar bo‘yicha dividendlarni to‘lash muddati 11-avgustdan 10-oktabrgacha etib belgilangan. To‘lovlar pul mablag‘lari ko‘rinishida amalga oshiriladi.

“O‘zbekinvest”ning ustav kapitali 303,45 mlrd so‘mni tashkil etadi. Kompaniya umumiy sug‘urta bozorida faoliyat yuritadi va sug‘urta faoliyati klassifikatori bo‘yicha mavjud 17 turdagi sug‘urta xizmatlarini taqdim etadi.